熊本自駕遊2024-2025 - 溫泉美食4日快閃之旅【行程+心得+私人google map收藏】

估唔到宜家去九州咁方便！香港航空新開咗熊本直航喎，逢二、四、六有飛！加上福岡、鹿兒島都有唔同航空公司飛，真係去邊都得！我私藏嘅google map 地圖係最底，記得收藏！

租車小貼士：今次我哋一落機就去咗機場一樓嘅租車櫃檯攞車。之前已經上網book定架Nissan Noah，因為有五個人加埋行李，SUV最啱。要記住帶齊護照同國際駕駛證！如果唔想自駕，都可以搭機場巴士去市區，每20分鐘一班，車程大約40分鐘；又或者可以搭JR豋先搭巴士。

Day 1：熊本市掃街食買瞓

落機已經四點，租完車直接入市區check in。揀咗間CANDEO HOTELS Kumamoto Shinshigai，就係新市街步行街上面，超級方便！間酒店有溫泉(居高臨下有市景），設計又新淨，幾正！

呢區其實仲有好多正嘅酒店：REF熊本、Richmond新市街，同埋有免費夜拉麵嘅Dormy Inn，都值得考慮。

熊本市區其實好易行，仲有路面電車圍繞市中心行駛，單程售價170日圓，都幾方便。

最緊要係去食勝烈亭啦！呢間嘢係熊本必食嘅炸豬扒專門店，排隊要成個半鐘㖭！不過唔使擔心，等緊嘅時候可以去熊本熊廣場、上通商店街行吓。記住要提早去排隊，七點前要攞飛㗎！

如果時間夠，水前寺成趣園都值得去。至於熊本城，因為要行好多樓梯，建議視乎體力先決定去唔去。搭路面電車去熊本城最方便，由新市街去大概要15分鐘。

Day 2：郊外農場の探索之旅

朝早就去咗近機場嘅家鄉市場掃零食同生果，啲士多啤梨同蜜柑超甜！全部水果都係香港一半價錢，買到好high！！！

地址：見下方Google map

買完就向東邊出發，去咗白系瀑布打卡，個瀑布好靚，水花好大，影相一流！如果唔駕車，都可以搭JR豐肥本線去阿蘇站，再轉阿蘇火山區巴士，不過班次少啲，建議查定時間表。

最正係去咗間阿蘇牛奶牧場！呢度真係好適合一家親黎玩！除咗有得餵牛、餵羊仔，重有得渣牛奶添！最得意係牛奶雪糕，好香好好食！牧場有1000個咁大嘅停車場，連旅遊巴都可以泊。

牧場名稱：酪農Mother's阿蘇牛奶牧場

其實阿蘇地區仲有好多適合親子遊嘅景點，例如：

• 村上巨峰園同Grape Garden Mashiki可以摘提子（9-10月）

• ICHIGO-EN Berry JU Berry同南阿蘇草莓園可以摘士多啤梨食到飽（12-5月）

• ASO KENKOU NOUEN Farm可以體驗農場生活

• Fairy Tale Zoo就最啱小朋友玩

下午去左IMAKIN食堂 牛排丼 食馬肉刺身~

講到睇景，阿蘇最出名梗係：

• 草千里展望所：可以遠眺阿蘇火山群，仲可以近距離睇到野生馬匹

• 阿蘇山噴煙展望公園：一定要check開放未先去！視乎火山活動情況可能會封閉

• 大觀峰展望所：可以360度睇阿蘇全景

• 想特別啲可以坐直升機睇火山，每次約15分鐘，要先到場預約

夜晚我哋住咗間休暇村南阿蘇，性價比高又包早晚餐！其實阿蘇都仲有好多特色酒店：

• El Patio Ranch：美式牧場風，適合一家大細

• 地獄温泉青風荘：傳統日式溫泉旅館，私密度高

• 格蘭德里奧阿蘇度假酒店：大溫泉區，設施齊全

Day 3：由布院溫泉小鎮由阿蘇去由布院大概要兩個鐘車程。如果冇租車，可以搭JR由阿蘇站轉車去由布院站，不過要轉兩三次車。今日特別去咗九重夢大橋，號稱日本最高嘅行人專用吊橋，高173米，橋上面對出去嘅景色真係超正！

响Kikusuke食完lunch之後，就去咗金鱗湖行吓，個湖面成日都有霧氣，好有詩意！想搵特別嘅景點，可以去佐々木農園摘梨添！由布院行街條街慢慢行真係好寫意，兩邊都係特色小店同cafe。

由布院出名嘅酒店真係數之不盡：

• 星野集團嘅界由布院最豪，環境一流但價錢都幾高

• 溫泉旅館草庵秋櫻：私密度高，適合情侶

• 秀峰館同玉之湯都係傳統溫泉旅館

  
  

但我哋因為諗住慳返啲錢，所以揀咗去別府airbnb住（最多10人房間）。由布院去別府都係個半鐘車程，JR都有直達特急列車，半個鐘就到。

Airbnb： https://www.airbnb.com.hk/rooms/970557221429782408

Day 4：別府地獄巡禮

最後一日就去咗別府嘅地獄巡禮！最出名係海地獄，個藍色溫泉池靚到癲！仲有血池地獄、龍捲地獄等等，每個都有唔同嘅特色。响度可以食溫泉蛋同溫泉包，味道一流！記住買套票會平好多。

之後就開車返熊本機場還車，路程大概兩個半鐘。還車嗰陣記住加滿油，機場附近都有油站。還完車仲可以响航站大樓行吓，買埋手信先至走。如果想慳返啲時間，都可以响別府搭JR返熊本（要兩個鐘）~

實用貼士：

1. 熊本機場租車一定要預早book，特別係旺季

2. 國際駕駛證要提前喺香港申請

3. 自駕記得租借ETC卡，過toll好方便

4. 阿蘇地區啲路較山，揀架車要考慮馬力

5. 各大溫泉酒店最好提前3個月預訂

6. 勝烈亭平日都要等，周末更加誇張，建議朝早去

7. 果園採摘要睇定季節先去，唔同水果有唔同季節

8. 阿蘇山要查實開放情況，免得白行

9. 停車場資訊要預先做功課，市區泊車都幾貴

10. 公共交通都方便，但自駕會更自由啲

雖然得四日三夜，但係原來呢個地方真係好值得慢慢玩！無論係親子遊定係情侶旅行都啱玩，下次一定要再嚟！最緊要係宜家有直航，時間又唔會太長，真係好適合快閃遊！

#熊本自駕遊 #九州旅遊 #熊本直航 #阿蘇牧場 #由布院 #別府地獄 #日本溫泉 #日本自由行 #親子旅遊 #情侶旅行 #九州景點 #熊本美食 #溫泉旅館 #自駕遊 #香港航空

分享